Helstu liðir í efnahagsreikningi Seðlabanka Íslands
Meðfylgjandi eru upplýsingar úr efnahagsreikningi
Seðlabanka Íslands í lok september 1999 og til samanburðar í lok desember 1998
ásamt breytingum í september og frá ársbyrjun.
Gjaldeyrisforði Seðlabankans
styrktist um 3,1 milljarð króna í september og nam í lok mánaðarins 34,7
milljörðum króna (jafnvirði 486 milljóna bandaríkjadala á gengi í mánaðarlok).
Frá ársbyrjun hafði forðinn styrkst um 5 milljarða króna. Styrking
gjaldeyrisforðans í september er tímabundin og skýrist af erlendum
lánahreyfingum ríkissjóðs til skamms tíma í því skyni að draga úr markaðsáhættu
vegna komandi áramóta.
Erlend skammtímalán bankans lækkuðu um 2,4 milljarða
króna í september og höfðu lækkað um 3,8 milljarða króna frá áramótum. Í lok
september námu erlend langtímalán bankans 1,3 milljörðum króna og höfðu lækkað
um 3,9 milljarða króna frá ársbyrjun. Seðlabankinn átti engin viðskipti á
innlendum millibankamarkaði með gjaldeyri í september. Gengi íslensku krónunnar,
mælt með vísitölu gengisskráningar, hækkaði um 0,6% í mánuðinum.
Heildareign
Seðlabankans í markaðsskráðum verðbréfum nam 8,9 milljörðum króna í septemberlok
miðað við markaðsverð og lækkaði um 1,4 milljarða króna í mánuðinum. Breytingin
fólst öll í sölu og innlausn ríkisvíxla, en í lok mánaðarins nam ríkisvíxlaeign
bankans 2,4 milljörðum króna.
Kröfur Seðlabankans á innlánsstofnanir lækkuðu
um 1,7 milljarða króna í september og námu þær 15,9 milljörðum króna í lok
mánaðarins. Kröfur á aðrar fjármálastofnanir hækkuðu um 0,6 milljarða króna í
mánuðinum og voru 8,5 milljarðar í lok hans.
Nettókröfur bankans á ríkissjóð
og ríkisstofnanir lækkuðu um 5,2 milljarða króna í september og voru þær
neikvæðar um 12 milljarða króna í lok mánaðarins.
Grunnfé bankans
dróst saman um 0,5 milljarða króna í mánuðinum og nam 23,3 milljörðum króna í
lok hans.
Nánari upplýsingar veita bankastjórar Seðlabanka Íslands og Erla
Árnadóttir aðalbókari í síma 569-9600.
Helstu liðir í efnahagsreikningi Seðlabankans
Nr. 64/1999
6. október 1999