Breytingar á bindiskyldu lánastofnana í Seðlabanka Íslands
Seðlabanki Íslands hefur á undanförnum árum stefnt að því að búa, eftir
því sem aðstæður leyfa, íslenskum lánastofnunum starfsumhverfi sem er
sambærilegt því sem tíðkast í flestum Evrópuríkjum. Í því skyni hafa verið
gerðar breytingar á reglum er varða tilhögun á fyrirgreiðslu bankans við
lánastofnanir, skilgreiningu á bindiskyldum lánastofnunum og kröfur um
uppgjörstryggingar.
Bankastjórn Seðlabanka Íslands hefur ákveðið að stíga frekari skref í þessa
átt með eftirtöldum breytingum á reglum um bindiskyldu íslenskra lánastofnana:
1. Frá 21. mars 2003 verða bindihlutföll, þ.e.
hlutföll innláns-
bindingar lánastofnana, sem nú eru
1,5% og 4%, lækkuð í
1% og
3%.
2. Frá 1. apríl 2003
verður svigrúm lánastofnana til að nýta bundið
fé
til tryggingar fyrir uppgjöri í greiðslukerfum takmarkað
við
helming umsaminnar tryggingarfjárhæðar. Þessi
takmörkun er til
þess ætluð að tryggja að
lánastofnanir hafi svigrúm á
bindireikningi til að mæta sveiflum í
lausafjárstöðu.
3. Fyrir lok ársins eru fyrirhugaðar frekari
breytingar svo sem að
færa bindigrunninn og
bindihlutföll til samræmis við reglur
Seðlabanka
Evrópu. Jafnframt fellur þá niður heimild til að
nota
bundið
fé til tryggingar fyrir uppgjöri í greiðslukerfum.
Búast má við að
framangreindar breytingar geti leitt til um helmings lækkunar á bindiskyldu
íslenskra lánastofnana.
Nánari upplýsingar veitir Birgir Ísleifur
Gunnarsson formaður bankastjórnar Seðlabanka Íslands í síma 569-9600.
Nr. 5/2003
28. febrúar 2003