Nýjar reglur um bindiskyldu fjármálafyrirtækja
Bankastjórn Seðlabanka Íslands hefur sett nýjar reglur um bindiskyldu fjármálafyrirtækja (lánastofnana) sem hafa starfsleyfi samkvæmt 1., 2. og 3. tl. 4. greinar laga nr. 161/2002 um fjármálafyrirtæki. Fyrr á árinu boðaði Seðlabankinn breytingar á bindiskyldu sem hefðu það að meginmarkmiði að samræma, eftir því sem aðstæður leyfa, starfsumhverfi hérlendra fjármálafyrirtækja starfsumhverfi sambærilegra fyrirtækja í flestum löndum Evrópu (sbr. frétt bankans nr. 5/2003 frá 28. febrúar sl.). Þess var jafnframt getið að breytingum yrði hrundið í framkvæmd í tveimur áföngum. Í fyrri áfanga yrðu bindihlutföll lækkuð nokkuð og í síðari áfanga yrðu reglur Seðlabankans um bindigrunn og bindihlutfall færðar til samræmis við reglur sem Seðlabanki Evrópu hefur sett lánastofnunum sem starfa í aðildarlöndum Efnahags- og myntbandalags Evrópu. Þess var jafnframt getið að áfangarnir myndu væntanlega hvor um sig leiða til áþekkrar lækkunar bindiskyldu. Fyrri áfanginn tók gildi í mars sl.
Í nóvemberhefti ársfjórðungsrits Seðlabankans Peningamála var frá því greint að ef nauðsynlegt reyndist myndi bankinn beita aðgerðum til þess að vinna gegn innlendri peningaþenslu af völdum reglulegra gjaldeyriskaupa sinna á komandi ári. Hið sama gildir um áhrif breytinganna á bindiskyldu.
Sem fyrr segir hefur bankastjórn Seðlabanka Íslands nú sett nýjar reglur um bindiskyldu og taka þær gildi 21. desember nk. Reglurnar hafa verið birtar á heimasíðu Seðlabankans og verða birtar í B-deild Stjórnartíðinda nú í desember.
Nánari upplýsingar veitir Birgir Ísleifur Gunnarsson formaður bankastjórnar Seðlabanka Íslands í síma 569-9600.
Nr. 31/2003
2. desember 2003