Trygg­ingastærðfræðing­ar

Einstaklingar geta hlotið viðurkenningu frá Seðlabanka Íslands til að sinna verkefnum tryggingastærðfræðings tiltekinna líftryggingafélaga og til að sinna tryggingafræðilegum athugunum í starfsemi lífeyrissjóða.

Þannig skal líftryggingafélag sem fellur undir undanþáguákvæði skv. 3. mgr. 3. gr. laga nr. 100/2016, um vátryggingastarfsemi (m.ö.o. líftryggingafélag sem undanþegið er Solvency II tilskipuninni) tryggja sér þjónustu tryggingastærðfræðings, eða sérfræðings með sambærilega þekkingu, sem hefur á hendi nauðsynlega tryggingatæknilega útreikninga og athuganir fyrir félagið, sbr. 3. mgr. 48. gr. laganna. Má sá einn taka að sér slíkt starf fyrir þess háttar líftryggingafélag sem hlotið hefur viðurkenningu Seðlabankans, sbr. 6. mgr. sömu greinar.

Þá ber stjórn lífeyrissjóðs að láta árlega fara fram tryggingafræðilega athugun á fjárhag sjóðsins í samræmi við 39. gr. laga nr. 129/1997, um skyldutryggingu lífeyrisréttinda og starfsemi lífeyrissjóða, og ákvæði reglugerðar nr. 391/1998, með síðari breytingum. Skal tryggingafræðileg athugun framkvæmd af tryggingafræðingi eða sérfræðingi með sambærilega þekkingu, sem hlotið hafa viðurkenningu Seðlabankans til slíks starfs samkvæmt lögum nr. 100/2016, sbr. 2. mgr. 24. gr. laga nr. 129/1997.

Við mat á hvort veita ber aðilum viðurkenningu hefur Seðlabankinn til hliðsjónar námskrár í tryggingafræði, sbr. þær sem International Actuarial Association (IAA) eða Actuarial Association of Europe (AAE) gefa út. Þess utan er einnig litið til þess hvort aðili hafi starfsreynslu sem nýtist til starfans.