Meðfylgjandi eru upplýsingar úr efnahagsreikningi Seðlabanka Íslands í lok desember 2002 og til samanburðar í lok desember 2001 ásamt breytingum í desember 2002 og frá ársbyrjun 2002.
Þar sem áramótauppgjöri og endurskoðun er ekki lokið eru tölur fyrir desemberlok 2002 bráðabirgðatölur og kunna þær að taka breytingum í endanlegu uppgjöri.
Gjaldeyrisforði Seðlabankans jókst lítillega milli mánaða og nam 37,2 milljörðum króna í lok desember (jafnvirði 462 milljóna Bandaríkjadala á gengi í mánaðarlok). Erlend skammtímalán bankans stóðu því sem næst í stað í mánuðinum og námu 16,5 milljörðum króna í lok hans.
Seðlabankinn keypti gjaldeyri á innlendum millibankamarkaði fyrir 1,1 milljarð króna, og er það er í samræmi við áætlun hans um aðgerðir til að styrkja gjaldeyrisstöðu sína sem kynnt var í frétt bankans nr. 28/2002. Gengi íslensku krónunnar styrktist í mánuðinum um 2,6% og um 13,5% á árinu 2002.
Markaðsskráð verðbréf í eigu bankans námu 5,3 milljörðum króna í desemberlok miðað við markaðsverð. Þar af námu markaðsskráð verðbréf ríkissjóðs 1,8 milljörðum króna.
Kröfur Seðlabankans á innlánsstofnanir lækkuðu um 10 milljarða króna í desember og námu 69,1 milljarði króna í lok mánaðarins. Kröfur á aðrar fjármálastofnanir hækkuðu lítillega í mánuðinum og námu 8,2 milljarði króna í mánaðarlok.
Nettókröfur bankans á ríkissjóð og ríkisstofnanir jukust um 5,3 milljarða króna í desember og námu nettóinnstæður ríkissjóðs 20,9 milljörðum króna í lok mánaðarins.
Grunnfé bankans dróst saman í desember um 7,6 milljarða króna og nam það 32,6 milljörðum króna í mánaðarlok.
Nánari upplýsingar veita bankastjórar Seðlabanka Íslands í síma 569-9600.
| Helstu liðir í efnahagsreikningi Seðlabankans | ||||
|---|---|---|---|---|
| Í milljónum króna | ||||
| Staða í lok tímabils | Hreyfingar 2002 | |||
| Desember | Desember | Frá ára- | Í | |
| Eignaliðir : | 2001 | 2002 | mótum | desember |
| Gjaldeyrisforði | 36.573 | 37.193 | 619 | 648 |
| Markaðsskráð verðbréf | 5.099 | 5.260 | 162 | 96 |
| Ríkissjóðs | 2.144 | 1.816 | -329 | 20 |
| Annarra | 2.954 | 3.445 | 490 | 75 |
| Kröfur á innlánsstofnanir | 54.053 | 69.141 | 15.088 | -9.982 |
| Kröfur á aðrar fjármálastofnanir | 22.774 | 8.227 | -14.548 | 130 |
| Skuldaliðir: | ||||
| Erlendar skuldir til skamms tíma | 14.979 | 16.499 | 1.520 | 95 |
| Seðlar og mynt | 9.174 | 9.590 | 416 | 314 |
| Almennar innstæður innlánsstofnana | 965 | 1.163 | 199 | -168 |
| Staða á bindireikningum innlánsstofnana | 17.678 | 21.874 | 4.196 | -7.711 |
| Almennar innstæður annarra fjármálastofnana | 837 | 75 | -762 | -715 |
| Staða á bindireikningum annarra fjármálastofnana | 1.288 | 1.259 | -29 | -46 |
| Liðir til skýringar : | ||||
| Gjaldeyrisstaða Seðlabankans, nettó: | 21.595 | 20.694 | -901 | 553 |
| Kröfur á ríkissjóð og ríkisstofnanir, nettó: | -31.099 | -20.851 | 10.248 | 5.300 |
| Kröfur á aðra, brúttó | 76.932 | 77.433 | 501 | -9.882 |
| Grunnfé: | 27.817 | 32.626 | 4.810 | -7.564 |
Skýringar:
Gjaldeyrisforði sýnir brúttóeign Seðlabankans í erlendum gjaldeyri. Markaðsskráð verðbréf ríkissjóðs sýna eign bankans í spariskírteinum ríkissjóðs, ríkisbréfum og ríkisvíxlum. Markaðsskráð verðbréf annarra eru húsbréf og húsnæðisbréf. Kröfur á innlánsstofnanir eru brúttókröfur bankans á innlánsstofnanir. Kröfur á aðrar fjármálastofnanir eru brúttókröfur bankans á þessar stofnanir. Erlendar skuldir til skamms tíma sýna skammtímalán sem Seðlabankinn tekur við og við, m.a. í því skyni að styrkja gjaldeyrisforðann. Seðlar og mynt sýna heildarfjárhæð seðla og myntar í umferð utan Seðlabanka. Almennar innstæður innlánsstofnana og annarra fjármálastofnana eru innstæður þeirra á viðskiptareikningum í Seðlabankanum og bundnar innstæður innlánsstofnana og annarra fjármálastofnana eru innstæður sem þeim er skylt að eiga í Seðlabankanum í samræmi við bindiskyldu sem bankinn ákveður. Neðanmáls eru sýndir fjórir liðir til skýringar, í fyrsta lagi nettógjaldeyrisstaða Seðlabankans sem sýnir erlendar eignir til skamms tíma að frádregnum erlendum skuldum til skamms tíma, í öðru lagi nettókröfur Seðlabankans á ríkissjóð og ríkisstofnanir, þ.e. skuldir þessara aðila við Seðlabankann að frádregnum innstæðum þeirra í bankanum, í þriðja lagi innlendar brúttókröfur á aðra en ríkið, og í fjórða lagi grunnfé bankans en til þess teljast seðlar og mynt í umferð og innstæður innlánsstofnana í Seðlabankanum.
Nr. 1/2003
8. janúar 2003