28. september 2021
Kalkofninn – ný vefútgáfa Seðlabanka Íslands hefur göngu sína
Í dag hefur Kalkofninn, ný vefútgáfa Seðlabanka Íslands, göngu sína. Í Kalkofninum birtast greinar eftir stjórnendur og starfsfólk Seðlabankans. Markmiðið með útgáfunni er að auka framboð á aðgengilegu efni um starfsemi og verkefni Seðlabankans og það sem efst er á baugi hverju sinni innan hans. Í öðru lagi að vera vettvangur þar sem stjórnendur og starfsfólk geta sett fram áhugavert efni sem tengist sérsviði þeirra innan bankans og á erindi við almenning og í þriðja lagi að stuðla að vandaðri og upplýstri umræðu um málefnasvið Seðlabankans.Þær skoðanir sem fram koma í Kalkofninum eru á ábyrgð höfunda og þurfa ekki að endurspegla afstöðu Seðlabanka Íslands. Ritstjórn er í höndum varaseðlabankastjóra Seðlabanka Íslands þeirra Gunnars Jakobssonar, Rannveigar Sigurðardóttur og Unnar Gunnarsdóttur. Þau fylgja hinni nýju útgáfu úr hlaði með stuttri kynningargrein. Þar segir meðal annars:
„Í nýjum Seðlabanka horfum við til framtíðar. Það er stefna okkar að halda áfram að efla og treysta upplýsingamiðlun bankans enda nauðsynlegt fyrir bankann að vera í fremstu röð þegar kemur að greiningu og miðlun upplýsinga um efnahagsmál og málefni fjármálamarkaða. Gangsetning Kalkofnsins er mikilvægt skref í þá átt.“