Meðfylgjandi eru upplýsingar úr efnahagsreikningi Seðlabanka Íslands í lok júní 2003 og til samanburðar í lok desember 2002 ásamt breytingum í júní 2003 og frá ársbyrjun 2003.
Gjaldeyrisforði Seðlabankans stóð því sem næst í stað milli mánaða og nam 36,9 milljörðum króna í lok júní (jafnvirði 483 milljóna Bandaríkjadala á gengi í mánaðarlok). Erlend skammtímalán bankans lækkuðu í mánuðinum um 5,5 milljarða króna og námu þau 4,3 milljörðum króna í lok hans.
Seðlabankinn keypti gjaldeyri á innlendum millibankamarkaði fyrir 3,5 milljarða króna í júní, og er það er í samræmi við áætlun hans um aðgerðir til að styrkja gjaldeyrisstöðu sína sem m.a var greint frá í maíhefti Peningamála. Gengi íslensku krónunnar veiktist um 4,3% í júní.
Markaðsskráð verðbréf í eigu bankans námu 4,3 milljörðum króna í júnílok miðað við markaðsverð. Þar af námu markaðsskráð verðbréf ríkissjóðs 1,2 milljörðum króna.
Kröfur Seðlabankans á innlánsstofnanir lækkuðu um 3,4 milljarða króna í júní og námu 62,8 milljarði króna í lok mánaðarins. Kröfur á aðrar fjármálastofnanir hækkuðu lítillega og námu 8,0 milljörðum króna í mánaðarlok.
Nettókröfur bankans á ríkissjóð og ríkisstofnanir hækkuðu um 1,4 milljarða króna í júní og námu nettóinnstæður ríkissjóðs 24,5 milljörðum króna í lok mánaðarins.
Grunnfé bankans hækkaði í júní um 1,7 milljarða króna og nam það 34,4 milljarði króna í mánaðarlok.
Nánari upplýsingar veita bankastjórar Seðlabanka Íslands og Erla Árnadóttir aðalbókari í síma 569-9600.
| Helstu liðir í efnahagsreikningi Seðlabankans | |||||
|---|---|---|---|---|---|
| Í milljónum króna | |||||
| Staða í lok tímabils | Hreyfingar 2003 | ||||
| Desember | Júní | Frá ára- | Í | ||
| Eignaliðir : | 2002 | 2003 | mótum | júní | |
| Gjaldeyrisforði | 37.194 | 36.883 | -312 | -43 | |
| Gull | 1.727 | 1.663 | -63 | 42 | |
| Erlendur gjaldeyrir | 33.418 | 33.225 | -193 | -191 | |
| SDR | 12 | 7 | -5 | 0 | |
| Gjaldeyrisstaða IMF | 2.038 | 1.987 | -51 | 105 | |
| Markaðsskráð verðbréf | 5.260 | 4.328 | -932 | 42 | |
| Ríkissjóðs | 1.816 | 1.209 | -606 | 16 | |
| Annarra | 3.445 | 3.119 | -326 | 27 | |
| Kröfur á innlánsstofnanir | 69.141 | 62.844 | -6.297 | -3.411 | |
| Kröfur á aðrar fjármálastofnanir | 8.227 | 8.025 | -202 | 135 | |
| Skuldaliðir: | |||||
| Erlendar skuldir til skamms tíma | 16.499 | 4.330 | -12.169 | -5.527 | |
| Seðlar og mynt | 9.590 | 9.935 | 345 | 266 | |
| Almennar innstæður innlánsstofnana | 1.164 | 2.595 | 1.430 | 1.001 | |
| Staða á bindireikningum innlánsstofnana | 21.837 | 21.809 | -27 | 439 | |
| Almennar innstæður annarra fjármálastofnana | 75 | 13 | -63 | 1 | |
| Staða á bindireikningum annarra fjármálastofnana | 1.258 | 786 | -472 | 113 | |
| Liðir til skýringar : | |||||
| Gjaldeyrisstaða Seðlabankans, nettó | 20.696 | 32.553 | 11.857 | 5.484 | |
| Kröfur á ríkissjóð og ríkisstofnanir, nettó | -20.846 | -24.455 | -3.609 | 1.375 | |
| Kröfur á aðra, brúttó | 77.454 | 70.986 | -6.469 | -3.268 | |
| Grunnfé | 32.590 | 34.339 | 1.749 | 1.706 | |
Skýringar:
Gjaldeyrisforði sýnir brúttóeign Seðlabankans í erlendum gjaldeyri. Erlendur gjaldeyrir sýnir innstæður í erlendum bönkum og erlenda verðbréfaeign bankans. Gjaldeyrisstaða við IMF sýnir hreina innstæðu bankans hjá Alþjóðagjaldeyrissjóðnum. Markaðsskráð verðbréf ríkissjóðs sýna eign bankans í spariskírteinum ríkissjóðs, ríkisbréfum og ríkisvíxlum. Markaðsskráð verðbréf annarra eru húsbréf og húsnæðisbréf. Kröfur á innlánsstofnanir eru brúttókröfur bankans á innlánsstofnanir. Kröfur á aðrar fjármálastofnanir eru brúttókröfur bankans á þessar stofnanir. Erlendar skuldir til skamms tíma sýna skammtímalán sem Seðlabankinn tekur við og við, m.a. í því skyni að styrkja gjaldeyrisforðann. Seðlar og mynt sýna heildarfjárhæð seðla og myntar í umferð utan Seðlabanka. Almennar innstæður innlánsstofnana og annarra fjármálastofnana eru innstæður þeirra á viðskiptareikningum í Seðlabankanum og bundnar innstæður innlánsstofnana og annarra fjármálastofnana eru innstæður sem þeim er skylt að eiga í Seðlabankanum í samræmi við bindiskyldu sem bankinn ákveður. Neðanmáls eru sýndir fjórir liðir til skýringar, í fyrsta lagi nettógjaldeyrisstaða Seðlabankans sem sýnir erlendar eignir til skamms tíma að frádregnum erlendum skuldum til skamms tíma, í öðru lagi nettókröfur Seðlabankans á ríkissjóð og ríkisstofnanir, þ.e. skuldir þessara aðila við Seðlabankann að frádregnum innstæðum þeirra í bankanum, í þriðja lagi innlendar brúttókröfur á aðra en ríkið, og í fjórða lagi grunnfé bankans en til þess teljast seðlar og mynt í umferð og innstæður innlánsstofnana í Seðlabankanum.
Nr. 20/2003
4. júlí 2003