Sam­starf­svett­vang­ar

Seðlabanki Íslands hefur komið á fót samstarfsvettvöngum á sviði greiðslumiðlunar og fjármálainnviða þar sem fulltrúar, meðal annars fjármálafyrirtækja, stjórnvalda og hagsmunasamtaka, eiga sæti. Starf vettvanganna tekur mið af markmiði Seðlabankans um fjármálainnviði, þ.e. að þeir séu öruggir, skilvirkir, hagkvæmir og aðgengilegir og er ætlað að stuðla að traustum og öruggum innviðum sem þjóna þörfum samfélagsins. Seðlabankinn leggur jafnframt áherslu á að ýta undir nýsköpun og framþróun í greiðslumiðlun.

Greiðsluráð er samtalsvettvangur Seðlabankans, stjórnvalda og aðila á markaði um málefni fjármálainnviða og greiðslumiðlunar í víðum skilningi. Markmið greiðsluráðs er að styðja við stefnumótun í málaflokknum á Íslandi, draga fram sjónarmið aðila á markaði og veita stuðning við framþróun og nýsköpun á sviði greiðslumiðlunar.

Í störfum greiðsluráðs skulu sjónarmið um öryggi, virkni og hagkvæmni í allri virðiskeðju greiðslumiðlunar höfð að leiðarljósi. Ráðið getur stofnað vinnuhópa til að ræða og greina tiltekin málefni. Þá getur ráðið beint tillögum um tiltekin málefni til Seðlabanka Íslands, markaðsaðila og annarra aðila.

Seðlabankastjóri fer með formennsku í greiðsluráði og eru fundir að jafnaði haldnir tvisvar á ári. Eftirtaldir aðilar eru nú þátttakendur:

• Atvinnuvegaráðuneytið
• Fjártækniklasinn
• Menningar- og viðskiptaráðuneyti
• Neytendasamtökin
• Reiknistofa bankanna
• Samtök ferðaþjónustunnar
• Samtök fyrirtækja í fjármálaþjónustu
• Samtök iðnaðarins
• Samtök verslunar og þjónustu
• Viðskiptaráð Íslands

Reglubókaráð fjallar um og gerir tillögu til Seðlabankastjóra um útgáfu reglubóka hér á landi, s.s. íslenskar reglubækur eða reglubækur sem byggjast á erlendri fyrirmynd. Reglubækur eru samansafn af viðurkenndum leikreglum í samskiptum milli kerfa. Reglubókaráð annast útfærslu og útgáfu reglubóka í samræmi við ákvörðun seðlabankastjóra, hefur umsjón með útgefnum reglubókum og annast breytingar á þeim.

Markmiðið með útgáfu reglubóka er að kveða á um réttindi og skyldur aðila að innviðum og setja leikreglur fyrir þátttakendur í greiðslukerfum, staðla verkferla og auka gagnsæi í rekstri þeirra. Reglubækur eru skuldbindandi fyrir þátttakendur í tilteknum fjármálainnviðum og er ætlað að auka öryggi og skilvirkni þeirra. Reglubókaráð var stofnað að erlendri fyrirmynd, þ.e. frá Evrópu og Norðurlöndum.

Eftirtaldir aðilar eiga nú sæti í reglubókaráði:

• Arion banki
• Íslandsbanki
• Kvika
• Landsbankinn
• Reiknistofa bankanna
• Sparisjóðir
• Seðlabankinn

Seðlabankinn gefur út reglubækur og birtir reglubækur og viðeigandi fylgiskjöl á vef sínum.

Framtíðarvettvangur er vettvangur um framtíðarstefnumótun fyrir fjármálainnviði í landinu með áherslu á grunninnviði greiðslumiðlunar og tengda innviði. Vettvangurinn var settur á fót af Seðlabanka Íslands í nóvember 2021. Honum er ætlað að hafa almannahagsmuni að leiðarljósi í störfum sínum.

Framtíðarvettvangur starfar undir forystu Seðlabanka Íslands og fjallar um framtíðarsýn og áherslur í þróun fjármálainnviða hér á landi með skilvirkni, öryggi og hagkvæmni að leiðarljósi. Framtíðarvettvangur fylgist jafnframt með þróun fjármálainnviða á alþjóðavettvangi og nýjungum sem geta haft þýðingu hér á landi.

Framtíðarvettvangur tekur á móti hugmyndum eða tillögum um nýtt samstarf á sviði fjármálainnviða og leggur mat á þær. Framtíðarvettvangur mun eingöngu taka til skoðunar verkefni sem Seðlabankinn telur nauðsynleg og í samræmi við lögbundið hlutverk sitt eða verkefni sem eru í þágu fleiri en eins kerfislega mikilvægs banka.

Eftirtaldir aðilar eiga nú sæti á framtíðarvettvangi:

• Arion banki
• Fjármála- og efnahagsráðuneytið
• Íslandsbanki
• Kvika
• Landsbankinn
• Reiknistofa bankanna
• Sparisjóðir
• Seðlabankinn