Álagspróf 2026

Álagspróf Seðlabanka Íslands bendir til þess að kerfislega mikilvægu viðskiptabankarnir þrír hafi nægan viðnámsþrótt til að viðhalda framboði lánsfjár og styðja þar með við þjóðarbúið í alvarlegu áfalli. Áfallið sem gert er ráð fyrir byggir á mögulegri og alvarlegri framvindu sem að þessu sinni er látin tengjast breytingum á hátt spenntum eignamörkuðum erlendis. Áfallið leiðir til samdráttar í landsframleiðslu, aukins atvinnuleysis og mikillar lækkunar eignaverðs hér á landi.

Mat Seðlabankans er að útlánatap kerfislega mikilvægra banka yrði í heild 147 ma.kr. samkvæmt sviðsmyndinni sem dregin er upp, sem nemur 3,2% af kröfuvirði útlánasafns bankanna við upphaf álagsprófsins. Sterkur grunnrekstur vegur á móti útlánatapi svo tap þeirra eftir skatta nemur einungis 3 ma.kr. á alvarlegasta ári sviðsmyndarinnar.

Hlutfall almenns eigin fjár þáttar 1 af áhættugrunni lækkar um 2,1 prósentur frá upphafi sviðsmyndarinnar til lággildis þess. Heildarkröfu um eiginfjárgrunn annars vegar og eigið fé þáttar 1 hins vegar er fullnægt öll árin. Miðað við niðurstöður álagsprófsins eru ekki horfur á að kerfislega mikilvægir bankar þyrftu að draga verulega úr lánveitingum til að verja eiginfjárhlutföll og valda með því enn dýpri samdrætti í efnahagslífinu.

Samanburður á niðurstöðum þessa álagsprófs og álagsprófsins sem birt var árið 2025 benda til að innleiðing CRR III regluverksins hafi gert áhættugrunn kerfislega mikilvægra banka að hluta til áhættunæmari og þannig aukið mögulegar sveiflur hans í áföllum og þar með lækkun eiginfjárhlutfalla.