Fjármálastöðugleikanefnd Seðlabanka Íslands tekur ákvarðanir um beitingu stjórntækja bankans er varða fjármálastöðugleika. Í fjármálastöðugleika felst að fjármálakerfið geti staðist áföll í efnahagslífi og á fjármálamörkuðum, miðlað lánsfé og greiðslum og dreift áhættu með viðhlítandi hætti.
Á fundi fjármálastöðugleikanefndar Seðlabanka Íslands 1. og 2. júní 2026 var farið yfir ýmsa þætti er varða fjármálastöðugleika. Auk þess voru teknar ákvarðanir um að halda gildi sveiflujöfnunarauka óbreyttu og tekin ákvörðun um hvaða innviðir teljist kerfislega mikilvægir.
Fjármálastöðugleikanefnd ákvað einróma að halda gildi sveiflujöfnunaraukans óbreyttu í 2,5% af innlendum áhættugrunni. Það er því áfram við efri mörk bilsins 2-2,5% sem nefndin hefur markað sem hlutlaust gildi í stefnu sinni um aukann, þ.e. þegar hvorki eru merki um aukna né litla áhættu í fjármálakerfinu.
Fjármálastöðugleikanefnd ákvað að eftirfarandi innviðir skuli teljast kerfislega mikilvægir og þess eðlis að röskun á starfsemi þeirra geti haft áhrif á fjármálastöðugleika: Millibankagreiðslukerfi Seðlabankans og verðbréfauppgjörskerfi Nasdaq sem grunninnviðir fjármálakerfisins og innlánakerfi Reiknistofu bankanna, greiðslukerfi Reiknistofu bankanna og rafræn auðkenning í fjármálaþjónustu hjá Auðkenni ehf. sem kjarnainnviðir fjármálakerfisins. Nefndin hafði áður ákveðið að millibankagreiðslukerfi Seðlabankans og verðbréfauppgjörskerfi Nasdaq væru kerfislega mikilvægir innviðir en í samræmi við nýjar reglur um yfirsýn með kerfislega mikilvægum innviðum, sem samþykktar voru undir lok árs 2025, voru þeir nú flokkaðir sem grunninnviðir.
Á fundi nefndarinnar voru ýmsir þættir fjármálastöðugleika greindir, s.s. alþjóðleg óvissa og efnahagsleg þróun, gengi krónunnar og gjaldeyrisforði, staða heimila og fyrirtækja, íbúðamarkaður, viðnámsþróttur bankakerfisins, álagspróf og greiðslumiðlun.