Fjármálaeftirlit Danmerkur, Finnlands, Íslands, Noregs og Svíþjóðar hafa gefið út sameiginlega yfirlýsingu um aukið norrænt samstarf á sviði fjármálaeftirlits.
Með yfirlýsingunni lýsa norrænu fjármálaeftirlitin yfir vilja til enn markvissara og kerfisbundnara samstarfs en áður. Markmiðið er að móta samræmdari norræna nálgun á þeim sviðum þar sem fjármálamarkaðir, starfsemi aðila og áhættuþættir ná í auknum mæli yfir landamæri.
Í fyrstu verður áhersla á tvö verkefni, annars vegar eftirlit með markaðsmisnotkun og hins vegar innleiðingu og framkvæmd nýs regluverks um greiðsluþjónustu. Fjármálaeftirlitin einsetja sér að ná árangri á báðum sviðum fyrir næsta fund stjórnenda fjármálaeftirlitanna sem haldinn verður í Stokkhólmi í ágúst 2027.
Fyrir Seðlabanka Íslands er aukið samstarf á sviði fjármálaeftirlits mikilvægur liður í að stuðla að aukinni samræmingu og miðlun þekkingar enda margar áskoranir og áhætta sambærileg þvert á Norðurlönd.
Yfirlýsinguna má nálgast hér: Yfirlýsing fjármálaeftirlita á Norðurlöndum
Samantekin atriði:
- Yfirlýsingin var samþykkt af fjármálaeftirlitsstofnunum Danmerkur, Finnlands, Íslands, Noregs og Svíþjóðar á fundi stjórnenda stofnananna í Kaupmannahöfn dagana 27.–28. ágúst 2026.
- Áherslusviðin tvö í samstarfinu fram til ágúst 2027 eru:
- eftirlitsaðferðir varðandi reglur um misnotkun á markaði
- innleiðing og beiting nýrra reglna um greiðsluþjónustu
- Markmiðið er að stuðla að samræmdari og fyrirsjáanlegri nálgun á Norðurlöndum varðandi eftirlit á sviðum sem einkennast af umfangsmikilli starfsemi yfir landamæri.