Tómas Brynjólfsson varaseðlabankastjóri fjármálastöðugleika hélt í dag erindi á málstofu um stafrænt fullveldi á Lagadeginum sem Lögmannafélag Íslands og Lögfræðingafélag Íslands stóðu fyrir. Þar fjallaði hann um efnahagslegt sjálfstæði í stafrænum heimi með sérstaka áherslu á stafrænt fullveldi, viðnámsþrótt og greiðslumiðlun.
Í erindi hans kom fram að breytt heimsmynd og aukin pólitísk spenna hafi aukið mikilvægi efnahagslegs öryggis og stafræns fullveldis. Í stafrænu fjármálakerfi sé mikilvægt að tryggja að almenningur geti nýtt fjármuni sína þótt truflanir verði á innviðum eða rafrænum tengingum. Til þess þurfi annars vegar að leita skjóls í alþjóðlegu samstarfi og hins vegar að styrkja innlendan viðnámsþrótt og tryggja raunhæfar varaleiðir. Seðlabankinn vinni í því skyni að styrkja seiglu greiðslumiðlunar og fjölga greiðsluleiðum, meðal annars með því að færa millifærslur milli banka í kerfi Seðlabanka Evrópu, byggja upp innlenda varalausn og gera greiðslur mögulegar þótt nettengingar rofni. Jafnframt sé unnið að nýjum innviðum sem geri millifærslur að raunhæfum valkosti við greiðslukort og dragi þannig úr háði íslensks samfélags af erlendum greiðslukerfum.
Það þarf að ríkja traust á að þeir sem halda á innstæðunum séu fjárhagslega sterkir og hægt sé að nýta þessa fjármuni þótt innviðir raskist eða rafrænar tengingar rofni. Að viðhalda þessu trausti er meginverkefni Seðlabanka Íslands.
Tómas lagði áherslu á að efnahagslegt sjálfstæði í stafrænum heimi fælist ekki í því að hverfa frá alþjóðlegu samstarfi. Fyrir smáríki á borð við Ísland væri slíkt samstarf mikilvæg forsenda öryggis og hagsældar, en á sama tíma þyrfti að tryggja innlendan viðnámsþrótt og viðbúnað áður en áfall verður. Með því væri traust á peninga- og fjármálakerfinu styrkt og þar með efnahagslegt sjálfstæði.