Í eftirliti á bankamarkaði felst eftirlit með lánastofnunum (viðskiptabönkum, sparisjóðum og lánafyrirtækjum) og verðbréfafyrirtækjum. Eftirlitið er annars vegar reglubundið í samræmi við grunneftirlitslíkan fjármálaeftirlitsins. Samkvæmt grunneftirlitslíkaninu er skilgreint hversu oft helstu áhættuþættir í rekstri fyrirtækjanna eru teknir til athugunar, þ.m.t. svonefnt könnunar- og matsferli (SREP). Hins vegar er eftirlitið atviksbundið, þ.e. með sértækum athugunum, þ.m.t. vettvangsathugunum, sem taka mið af áhættumati og aðstæðum hverju sinni. Viðskiptalíkön eru greind og mat lagt á stjórnarhætti og innra eftirlit. Einstaka áhættuþættir í starfsemi hvers og eins fyrirtækis eru metnir. Annars vegar er lagt mat á áhættuþætti sem geta haft áhrif á eigið fé og hins vegar áhættuþætti sem geta haft áhrif á laust fé og fjármögnun. Megináhersla í eftirliti á bankamarkaði er að fyrirtækin búi við góða stjórnarhætti, sterka eiginfjár- og lausafjárstöðu sem tryggir fjárhagslegan styrk þeirra til að mæta óvæntum áföllum og að þau séu rekin á heilbrigðan og eðlilegan hátt með hagsmuni viðskiptavina, hluthafa, stofnfjáreigenda og alls þjóðarbúsins að leiðarljósi.
Nánari upplýsingar um eftirlit á bankamarkaði má finna hér.