Gjaldeyrismarkaður, gengisþróun og gjaldeyrisforði árið 2020
Gengi krónunnar lækkaði um 10,4% á árinu 2020 og heildarvelta á millibankamarkaði með gjaldeyri jókst um 124% frá fyrra ári. COVID-19 farsóttin hafði mikil áhrif á innlendan gjaldeyrismarkað og átti Seðlabankinn umfangsmikil gjaldeyrisviðskipti til að draga úr sveiflum og bæta verðmyndun á markaðnum.
Á árinu nam hrein gjaldeyrissala Seðlabankans 132,7 ma.kr. Gengið lækkaði mest í mars í kjölfar þess að fyrstu tilfelli COVID-19 greindust hér á landi en meiri stöðugleiki náðist mánuðina á eftir. Hlé lífeyrissjóða á gjaldeyriskaupum til erlendra fjárfestinga gegndi veigamiklu hlutverki í að viðhalda gengisstöðugleika. Seðlabankinn átti einnig gjaldeyrisviðskipti vegna umfangsmikilla fjármagnsviðskipta erlendra aðila á árinu í tengslum við sölu á innlendum verðbréfum og viðskipti með aflandskrónur. Gjaldeyrisforði Seðlabankans nam 816,7 ma.kr. í árslok eða um 30% af vergri landsframleiðslu.
Sjá nánar: Frétt nr. 2/2021, 15. janúar 2021: Gjaldeyrismarkaður, gengisþróun og gjaldeyrisforði árið 2020.