Helstu liðir í efnahagsreikningi Seðlabanka Íslands
Meðfylgjandi eru upplýsingar úr efnahagsreikningi Seðlabanka Íslands í lok
júlí 1999 og til samanburðar í lok desember 1998 ásamt breytingum í mánuðinum.
Gjaldeyrisforði Seðlabankans jókst um 2,3 milljarða króna í júlí og nam í
lok mánaðarins 33,4 milljörðum króna (jafnvirði 459 milljóna bandaríkjadala á
gengi í mánaðarlok). Að hluta til stafar aukning forðans af lántöku bankans
erlendis, en að henni frátalinni nam aukningin 0,9 milljörðum króna í mánuðinum
og 6 milljörðum króna frá ársbyrjun, svo sem sjá má á liðnum "gjaldeyrisstaða
nettó" í meðfylgjandi yfirliti.
Erlend skammtímalán bankans jukust í
mánuðinum um 1,4 milljarð og námu þau 1,5 milljarði í mánaðarlok, en hafa lækkað
um 2,5 milljarða frá áramótum. Löng erlend lán stóðu aftur á móti í stað og nema
nú 3,4 milljörðum króna, en hafa lækkað um 1,7 milljarð frá áramótum.
Í
júlímánuði námu viðskipti á millibankamarkaði með gjaldeyri alls 43,8 milljörðum
króna en Seðlabankinn átti engin viðskipti á þeim markaði í mánuðinum. Gengi
íslensku krónunnar, mælt með vísitölu gengisskráningar, lækkaði um 0,1% í
mánuðinum.
Markaðsskráð verðbréf í eigu bankans námu 11,6 milljörðum króna í
júlílok á markaðsverði og hækkuðu um 3,0 milljarða í mánuðinum. Breytingin fólst
öll í kaupum á ríkisvíxlum, en staða þeirra í lok mánaðarins nam 5,3 milljörðum
króna.
Kröfur Seðlabankans á innlánsstofnanir lækkuðu um 0,5 milljarða í júlí
og námu þær 15,0 milljörðum í lok mánaðarins. Kröfur á aðrar fjármálastofnanir
hækkuðu aftur á móti um 0,7 milljarða og voru 5,3 milljarðar króna í lok
hans.
Nettókröfur bankans á ríkissjóð og ríkisstofnanir hækkuðu um 3,4
milljarða króna í mánuðinum og voru neikvæðar um 2 milljarða króna í lok
júlí.
Grunnfé bankans jókst um 4,8 milljarða króna í mánuðinum og nam það
26,8 milljörðum króna í lok hans.
Nánari upplýsingar veita bankastjórar Seðlabanka Íslands og Erla Árnadóttir aðalbókari í síma 569-9600.
Helstu liðir í efnahagsreikningi Seðlabankans
Nr. 49/1999
6. ágúst 1999