Seðlabanki

Endurskoðun á gengisskráningarvog krónunnar

Seðlabanki Íslands hefur endurskoðað gengisskráningarvog krónunnar í ljósi utanríkisviðskipta ársins 2001. Slík endurskoðun fór síðast fram í júlí árið 2001. Meðfylgjandi tafla sýnir nýju vogina og breytingar frá fyrri vog. Nýja vogin tekur gildi eftir gengisskráningu í dag 5. júlí 2002 og verður notuð við útreikning gengisvísitölunnar þar til næsta endurskoðun fer fram um svipað leyti að ári.
Gengisskráningarvogin er endurskoðuð árlega í ljósi samsetningar utanríkisviðskipta árið áður. Markmiðið er að hún endurspegli ætíð eins vel og kostur er samsetningu utanríkisviðskipta þjóðarinnar, bæði vöru- og þjónustuviðskipta. Áhersla er lögð á að hér er aðeins um að ræða tæknilega breytingu á þeirri gengisvog sem notuð er við daglegan útreikning á gengi krónunnar og felur ekki í sér breytingu á stefnu Seðlabankans. Helstu breytingar frá fyrri vog eru að vægi evru eykst um 5,4%, einkum á kostnað vægis Bandaríkjadals, sem minnkar um 2,2%, og bresks punds, sem minnkar um 2%. Aukið vægi evrunnar skýrist af auknu vægi hennar í þjónustuviðskiptum. Með þessum breytingum hefur þróun síðustu ára snúist við, en á árunum 1997-2001 jókst vægi Bandaríkjadals í gengisskráningarvog krónunnar úr 22,4% í 27,0%.
Nánari upplýsingar veitir Arnór Sighvatsson, deildarstjóri á hagfræðisviði Seðlabanka Íslands, í síma 5699600.

25/2002
5. júlí 2002