Vistvænir ferðamátar í Seðlabankann
Seðlabanki Íslands hefur hvatt starfsfólk til að velja vistvæna, hagkvæma og heilsusamlega ferðamáta til og frá vinnu. Í þeim tilgangi hefur verið gerður sérstakur samgöngusamningur við þá starfsmenn sem vilja. Nú þegar hafa 29 starfsmenn bankans gert svona samgöngusamning, en samgöngustefna fyrir starfsmenn bankans var kynnt 8. maí 2012.
Samningurinn felst í því að starfsmenn mæta ekki á eigin bíl til vinnu, heldur ganga, hjóla eða fara með strætisvagni í vinnuna og fá þá dálítið framlag upp í kostnað. Með þessu vill Seðlabankinn leggja sitt af mörkum til að bæta umhverfi borgarbúa með minni umferð og minni þörf fyrir bílastæði, en bæta um leið heilsu starfsfólks, sýna gott fordæmi og efla vitund fólks um vistvænar samgöngur.
Strax í upphafi tóku tveir tugir starfsmanna þátt í þessu átaki, en nú hefur þeim fjölgað um tæplega helming og er þá fimmtungur starfsmanna sem tekur þátt í átakinu. Ennfremur geta þeir starfsmenn sem þurfa að fara á fundi utan bankans fengið til þess strætómiða eða farið á öðru af tveimur reiðhjólum sem bankinn hefur nú yfir að ráða.
Með þessu vill Seðlabankinn taka þátt í því átaki sem er meðal ýmissa fyrirtækja og stofnana um að leggja aukna áherslu á umhverfis- og heilsuvernd sem lið í samfélagslegri ábyrgð.
Á meðfylgjandi eru þrír af þeim starfsmönnum bankans sem nýta sér reiðhjól á sínum ferðum. Frá vinstri eru Sigríður Benediktsdóttir, framkvæmdastjóri fjármálastöðugleikasviðs og tveir aðrir starfsmenn á því sviði, þau Indriði F. Indriðason og Guðríður Lilla Sigurðardóttir.