Seðlabanki

Nýr 10.000 króna seðill

Seðlabanki Íslands setur nýjan tíu þúsund króna seðil í umferð fimmtudaginn 24. október næstkomandi. Tilgangur með útgáfu seðilsins er að gera greiðslumiðlun á Íslandi liprari og hagkvæmari, meðal annars með því að fækka seðlum í umferð.

Seðillinn er tileinkaður Jónasi Hallgrímssyni, en í seðlinum má finna vísanir í störf Jónasar sem skálds, íslenskumanns, alþýðufræðara og náttúrufræðings. Á framhlið er mynd af Jónasi Hallgrímssyni, Háafjalli og Hraundranga. Þar eru einnig ljóðlínur úr kvæðinu Ferðalok með rithönd Jónasar. Hæðarlínur fjallsins Skjaldbreiðs mynda grunnmynstur bak- og framhliðar. Á bakhlið er blýantsteikning Jónasar af fjallinu Skjaldbreið ásamt vetrarljósmynd af fönnum fjallsins. Hæðarlínum Skjaldbreiðs er varpað inn á myndina. Einnig eru þar myndir af lóum og hörpuskel og ljóðlínur með rithönd Jónasar úr fyrsta erindi kvæðisins Fjallið Skjaldbreiður. Gerð seðilsins er svipuð og þeirra seðla sem nú eru í umferð, auk nýrra og fullkomnari öryggisþátta. Stærð hans er 70 x 162 millimetrar og aðallitur er blár.

Kristín Þorkelsdóttir hannaði seðilinn, en hún hefur stýrt hönnun íslenskra seðla frá árinu 1981. Samstarfsmaður og meðhönnuður hennar er Stephen Fairbairn.

Á heimasíðu Seðlabanka Íslands, https://www.sedlabanki.is/ , er kynningarefni um þennan nýja seðil. Enn fremur var í dag opnuð sýning um 10.000 kr. seðilinn í Myntsafni Seðlabanka og Þjóðminjasafns í sýningaraðstöðu í húsnæði Seðlabankans við Kalkofnsveg 1. Sýningin er að jafnaði opin frá kl. 13:30 til kl. 15:30 á virkum dögum.

Nánari upplýsingar veitir Már Guðmundsson seðlabankastjóri í síma 569 9600.