Vorfundur Alþjóðagjaldeyrissjóðsins 2016
Már Guðmundsson seðlabankastjóri sótti vorfund Alþjóðagjaldeyrissjóðsins (AGS) sem haldinn var í Washington í Bandaríkjunum dagana 15. til 17. apríl síðastliðinn. Fulltrúar Seðlabankans áttu auk þess fundi með stjórnendum og starfsfólki AGS, fulltrúum fjármálastofnana og matsfyrirtækja ásamt því að sækja ráðstefnur í tengslum við fundina.
Á fundi fjárhagsnefndar AGS (e. International Monetary and Financial Committee) kynnti framkvæmdastjóri AGS mat sitt á stöðu og horfum í heimsbúskapnum og helstu viðfangsefni AGS.
Fulltrúi kjördæmis Norðurlanda og Eystrasaltsríkja í fjárhagsnefnd AGS var að þessu sinni fjármálaráðherra Noregs, Siv Jensen, og má nálgast yfirlýsingu hennar fyrir hönd kjördæmisins hér að neðan.
Í ályktun fjárhagsnefndar Alþjóðagjaldeyrissjóðsins, sem er undir forystu Agustín Carstens, seðlabankastjóra Mexíkó, kemur m.a. fram að hagvaxtarhorfur eru taldar veikari en þær voru á síðasta fundi nefndarinnar. Hagvöxtur heldur þó áfram hægum skrefum. Órói á fjármálamörkuðum hefur aukist og hægt hefur á vexti heimsviðskipta. Veik eftirspurn, lítil framleiðni og eftirhreytur fjármálakreppunnar halda aftur af endurbata í hagkerfum þróaðra ríkja og hægst hefur á vexti í nýmarkaðs- og þróunarríkjum. Aukin landfræðipólitísk (e. geopolitical) spenna, flóttamannavandi og óvissa varðandi mögulega útgöngu Breta úr Evrópusambandinu gæti aukið áhættu í heimsbúskapnum í nánustu framtíð. Mikilvægt er að stefnumörkun landa sé markviss með áherslu á hagvaxtarhvetjandi ríkisfjármálastefnu og kerfisumbætur.
Ályktun fjárhagsnefndar Alþjóðagjaldeyrissjóðsins er aðgengileg hér.
Hér má sjá dagskrá vorfundarins í heild sinni.
Hér má sjá ráðgjöf sjóðsins hvað varðar stefnumótun á alþjóðavísu.
Meðfylgjandi er mynd sem tekin var af seðlabankastjórum og fulltrúum í sjóðráði Alþjóðagjaldeyrissjóðsins á fundinum. Már Guðmundsson seðlabankastjóri er fimmti frá vinstri í þriðju öftustu röð.