Gjaldeyrismarkaður, gengisþróun og gjaldeyrisforði árið 2018
Gengi krónunnar lækkaði um 6,4% á árinu 2018 og velta á millibankamarkaði með gjaldeyri dróst mikið saman frá fyrra ári. Á síðari hluta ársins 2018 seldi Seðlabankinn gjaldeyri á millibankamarkaði í þrjú skipti með það að markmiði að draga úr sveiflum á gengi krónunnar. Hrein gjaldeyrissala Seðlabankans á markaðnum nam 2,9 ma.kr. á árinu.
Gengi krónunnar var tiltölulega stöðugt fyrstu átta mánuði ársins og velta var lítil. Á haustmánuðum skapaðist órói á gjaldeyrismarkaðnum, m.a. vegna óvissu í flugrekstri, og gengi krónunnar lækkaði. Í desember hækkaði gengi krónunnar á ný eftir nokkuð skarpa lækkun frá því í byrjun september. Seðlabankinn keypti þá gjaldeyri á millibankamarkaði í fyrsta skipti í meira en ár.
Í byrjun nóvember var breyting gerð á bindingarhlutfalli í reglum um bindingu reiðufjár vegna nýs innstreymis erlends gjaldeyris. Hlutfallið var lækkað úr 40% í 20%.
Gjaldeyrisforði nam 736 ma.kr. í árslok og nam 26% af vergri landsframleiðslu.
Þetta kemur fram í frétt Seðlabanka Íslands um gjaldeyrismarkað, gengisþróun og gjaldeyrisforða á árinu 2018. Sjá hér fréttina í heild ásamt töflum og myndum:
Gjaldeyrismarkaður, gengisþróun og gjaldeyrisforði árið 2018