Ný rannsóknarritgerð um aðferðir til að spá um verðbólgu og þátt launa- og gengisbreytinga í verðbólguferlinu
Seðlabanki Íslands hefur gefið út rannsóknarritgerðina „Wages and prices of foreign goods in the inflationary process in Iceland“ eftir Ásgeir Daníelsson, sem starfar á hagfræði- og peningastefnusviði SÍ.
Í ritgerðinni er fjallað um tölfræðilegar aðferðir við að meta jöfnur til að spá verðbólgu á Íslandi. Bent er á ástæður fyrir því að áhrif launabreytinga á verðbólgu á þessari öld eru oft ómarktæk og sýnt að í slíkum tilfellum getur verið skynsamlegt að notfæra sér að vísitala neysluverðs, laun á framleidda einingu og verð á innfluttum vörum í krónum eru samþættar stærðir og nota samband á milli þeirra til að spá fyrir um verðbólgu. Sýnt er hvernig mikill breytileiki í launabreytingum og einkum mikill breytileiki í breytingum í verði á innfluttum vörum, miðað við breytileika í verðbólgu, veldur því að stuðlar við breytingu í launum og breytingu í verði innfluttra vara í jöfnum fyrir verðbólgu verða lægri en ella.
Metin er spájafna fyrir verðbólgu þar sem samband vísitölu neysluverðs, launa og verðs á innfluttum vörum er skýristærð og prófað hvernig hún reynist í spám fyrir tímabilið 2018-2020. Þessi jafna spáir aðeins betur en jafnan sem nú er notuð í þjóðhagslíkani bankans, QMM, en spárnar eru síðri en þegar einfaldar spáformúlur eru notaðar.
Hægt er að nálgast rannsóknarritgerðina hér: Working paper nr. 87. Wages and prices of foreign goods in the inflationary process in Iceland.