Könnun á væntingum markaðsaðila
Seðlabanki Íslands kannaði væntingar markaðsaðila dagana 12. til 14. ágúst sl. Leitað var til 36 markaðsaðila á skuldabréfamarkaði, þ.e. banka, lífeyrissjóða, verðbréfa- og fjárfestingarsjóða, verðbréfamiðlana, fyrirtækja með starfsleyfi til eignastýringar og tryggingafélaga. Svör fengust frá 25 aðilum og var svarhlutfallið því 69%.
Helstu niðurstöður
Niðurstöður könnunarinnar gefa til kynna að markaðsaðilar vænti þess að verðbólga verði að meðaltali 6,2% á yfirstandandi ársfjórðungi. Það er meiri verðbólga en þeir væntu í síðustu könnun í apríl en þeir búast við að verðbólga hjaðni áfram í kjölfarið líkt og áður. Þá búast þeir við að verðbólga verði 4,3% að ári liðnu, samanborið við 4,6% í síðustu könnun en væntingar til tveggja og fimm ára voru óbreyttar milli kannana í 4% og 3,8%. Langtímaverðbólguvæntingar hækkuðu hins vegar lítillega og gera markaðsaðilar ráð fyrir því að verðbólga verði 3,6% að meðaltali á næstu tíu árum samanborið við 3,5% í síðustu könnun. Könnunin gefur til kynna að markaðsaðilar búist við litlum breytingum á gengi krónunnar á næstu misserum og að gengi evru gagnvart krónu verði 151 króna eftir eitt ár.
Miðað við miðgildi svara í könnuninni búast markaðsaðilar við því að meginvextir bankans verði óbreyttir í 9,25% á fjórðungnum en taki að lækka á fjórða ársfjórðungi. Þeir gera ráð fyrir að meginvextir verði 7,75% eftir eitt ár og 6,25% eftir tvö ár. Það eru lítillega hærri vextir en í síðustu könnun.
Hlutfall svarenda sem töldu taumhald peningastefnunnar of mikið minnkaði milli kannana og var 52% samanborið við 62% í aprílkönnuninni. Á móti fjölgaði þeim sem töldu taumhaldið hæfilegt í 40% úr 34% í síðustu könnun og þeim sem töldu taumhaldið of laust fjölgaði í 8% samanborið við 3% í apríl.
Dreifing svara markaðsaðila um væntingar til verðbólgu jókst lítillega á flesta mælikvarða frá síðustu könnun en dreifing svara um væntingar til vaxta minnkaði hins vegar á flesta mælikvarða.
Sjá væntingakönnunina hér: Könnun á væntingum markaðsaðila á 3. ársfjórðungi 2024.
Frekari upplýsingar um könnun á væntingum markaðsaðila má finna hér: Væntingakönnun markaðsaðila.