Greiðslumiðlun

Fyrirtæki í greiðslumiðlun auðvelda greiðslur frá korthöfum til söluaðila með greiðslumiðlunartækni, þ.m.t. kort og posar. Gögn um greiðslumiðlun endurspegla veltu og færslufjölda innlendra korta innanlands, auk veltu og færslufjölda erlendra korta innanlands.

Greiðslumiðlunarmarkaði má í grófum dráttum skipta í tvennt:

• Kortaútgefendur: Gefa út kort til einstaklinga og fyrirtækja til að framkvæma greiðslur fyrir vörur og þjónustu. Auk þess er að hægt að taka út reiðufé með kortafærslum.  Athugið að hér er um að ræða innlendar fjármálastofnanir en ekki alþjóðleg kortakerfi á borð við Mastercard eða VISA.
• Færsluhirðar: Útvega söluaðilum posa og annars háttar tæknilausnir til að taka á móti og vinna úr greiðslum frá korthöfum.

Auk þess má nefna að notkun á annars háttar greiðslumiðlunartækni hefur færst í aukana, t.a.m. er hægt að greiða fyrir vörur og þjónustu með beinum millifærslum. Eins má nefna reikning-í-reikning greiðslur og kortalausa færsluhirðingu á borð við PayPal.  Notkun reiðufés tíðkast enn. Gagnasöfnun Seðlabankans leitast við að ná utan um umfang ólíkra greiðsluleiða.