Fjármálareikningar fjármálafyrirtækja

Fjárhæðir eru í milljónum króna (m.kr.)

Gögnum um fjármálareikninga er safnað í því skyni að fá heildstætt yfirlit yfir helstu liði í efnahagsreikningum fjármálafyrirtækja sundurliðað eftir tegund fjár­mála­af­urðar og mótaðila. Þannig gefa þeir til kynna þróun fjár­hags­legra stærða hagkerfis og birta saman­tekt á upplýs­ingum frá þeim. Fjár­mála­reikn­ingar eru hluti af hagskýrslu­gerð Seðla­bankans og unnir í samstarfi við Hagstofu Íslands. Seðla­bankinn nýtir gögnin jafn­framt í starf­semi sinni.

Gagnasöfnunin fer fram á grundvelli 32. gr. laga um Seðlabanka Íslands, nr. 92/2019. Í samræmi við 41. gr. laganna hefur Hagstofa Íslands einnig aðgang að þeim gögnum sem Seðlabankinn safnar skv. samstarfssamningi sem stofnanirnar hafa gert með sér.

Fjármálareikningar eru hluti af uppgjöri þjóðhagsreikninga en það er alþjóðlegt, samræmt reikningskerfi sem veitir nákvæma yfirsýn yfir þjóðarbúið og viðskipti þess við önnur lönd. Fjármálareikningar mynda heildstætt yfirlit yfir helstu liði í efnahagsreikningum fjármálafyrirtækja, skipt niður á tegundir fjármálaafurða.

Við vinnslu fjármálareikninga er farið eftir alþjóðlegri aðferðafræði skv. þjóðhagsreikningastaðli Evrópusambandsins ESA2010. Um er að ræða fjármálalegar eignir og skuldir og er þeim skipt í 8 yfirliði.

Fjármálareikningar eru aðallega unnir upp úr árs‐ og efnahagsreikningum fyrirtækja á fjármálamarkaði. Efnahagsreikningar þeirra aðila sem skila gögnum beint til Seðlabankans eru birtir á heimasíðu Seðlabanka Íslands, nema efnahagsreikningar skilanefnda fjármálafyrirtækja í slitameðferð eða nauðasamningaferli.

Fjármálareikningar eru unnir í samstarfi við Hagstofu Íslands. Seðlabankinn sér um uppgjör fyrir fjármálafyrirtæki og gagnvart útlöndum. Hagstofan birtir  yfirlit fjármálareikninga fyrir hagkerfið í heild sinni ásamt hverjum undirgeira fyrir sig. Fjármálareikningar eru þannig uppbyggðir að eignir eins aðila eru skuldir annars aðila og eru allar fjárhæðir mótaðilaflokkaðar.

Nýjustu tölur eru ávallt bráðabirgðatölur og geta tekið breytingum berist ný gögn frá skilaaðilum.

Ársfjórðungsleg gögn eru endurskoðuð eftir því sem leiðréttingar berast á innsendum skýrslum til Seðlabanka Íslands og þegar nýir ársreikningar eru birtir. Árslokagögn eru endurskoðuð þegar endurskoðaðir ársreikningar fjármálafyrirtækja liggja fyrir.

Leiðbeiningar fyrir skilaaðila er að finna í gagnaskilakerfi Seðlabanka Íslands.