Raungengi

Ítarleg gögn fyrir raungengi má nálgast á tímaraðaformi í Gagnabankanum

Gögnum um raungengi  er safnað í því skyni að fylgjast með þróun raungengis íslensku krónunnar. Seðlabankinn nýtir gögnin jafnframt í starfsemi sinni.

Gagnasöfnunin fer fram á grundvelli 32. gr. laga um Seðlabanka Íslands, nr. 92/2019. Í samræmi við 41. gr. laganna hefur Seðlabankinn heimild að eiga upplýsingaskipti við opinbera aðila um atriði sem lög þessi taka til þegar upplýsingaskiptin eru í samræmi við lögmælt hlutverk Seðlabankans eða móttakanda.

Raun­gengi er skil­greint sem hlut­fallsleg þróun verð­lags eða launa­kostn­aðar á fram­leidda einingu í heimalandi annars vegar og í viðskipta­lönd­unum hins vegar frá tilteknu grunnári og mælt í sama gjald­miðli og birt sem vísi­tala.

Gögn fyrir raungengi byggjast á opinberri gengisskráningu og neysluverðsvísitölum/vísitölum launakostnaðar á framleidda einingu fyrir Ísland og helstu viðskiptalönd Íslands samkvæmt vægi þeirra í utanríkisviðskiptum (þröngri viðskiptavog). Grunnár vísitölu raungengis er 2005 (ársmeðaltal 2005 = 100).

Vísitölur raungengis eru miðaðar við:

• Hlut­falls­legt neyslu­verð: Neysluverð á Íslandi í hlutfalli við neysluverð erlendis, reiknað í sama gjaldmiðli.
• Hlutfallslegur launakostnaður: Launakostnaður á framleidda einingu á Íslandi í hlutfalli við launakostnað á framleidda einingu erlendis, reiknaður í sama gjaldmiðli.

Nýjustu tölur eru ávallt bráðabirgðatölur.

Raungeng er endurreiknað þegar ný gögn varðandi þróun verðlags og launakostnaðar á framleidda einingu í helstu viðskiptalöndum Íslands berast. Útreikningar á raungengi eru uppfærðir mánaðarlega til þess að taka inn breytingar jafn óðum og þær berast.

Opinber birting gengis- og neysluverðsvísitalna er endanleg birting en vísitölur launakostnaðar á framleidda einingu taka jafnan breytingum sögulega í samræmi við endurskoðun á þjóðhagsreikningum Íslands og viðskiptalandanna. Stundum þarf að áætla gögn frá viðskiptalöndum þar sem þau hafa ekki borist í tæka tíð. Þegar þjóðhagsspá Seðlabankans liggur fyrir, er unnt að birta nýtt ársfjórðungsgildi fyrir raungengi m.v. hlutfallslegan launakostnað. Þetta gildi er svo uppfært í næstu birtingu raungengis eftir að þjóðhagsreikningar hafa verið gefnir út á vef Hagstofu Íslands.