![logo-for-printing](/themes/Bootstrap/img/logo.png)
Efnahagsleg áhrif þjóðaratkvæðagreiðslu um aðild Breta að ESB
![Bygging Seðlabanka Íslands Bygging Seðlabanka Íslands](/library/Ljosmyndir_ISL/Hus_ad_utan_ISL/sedlabanki35_ISL.jpg?proc=AdalmyndFrett)
Í þjóðaratkvæðagreiðslu sem fram fór á Bretlandi í gær varð niðurstaðan sú að Bretland muni hefja ferli útgöngu úr Evrópusambandinu. Það mun taka töluverðan tíma. Í framhaldi af þessari niðurstöðu hafa orðið sterk viðbrögð á alþjóðlegum fjármálamörkuðum sem einkennast af umtalsverðum breytingum á gengi gjaldmiðla og flótta í áhættuminni eignir. Af þessu tilefni hefur Seðlabanki Íslands ákveðið að birta minnisblað sem hann sendi stjórnvöldum síðastliðinn miðvikudag um hugsanleg áhrif af þeirri niðurstöðu úr þjóðaratkvæðagreiðslunni sem nú liggur fyrir á íslenskan þjóðarbúskap og fjármálamarkað. Samkvæmt minnisblaðinu er reiknað með að áhrifin verði líklegast neikvæð en ekki veruleg, sérstaklega þegar frá liður. Í þessu sambandi ber að undirstrika að íslenskar fjármálastofnanir hafa góða eiginfjárstöðu, bera takmarkaða áhættu gagnvart eignum í breskum pundum og eru vel fjármagnaðar í erlendum gjaldmiðlum. Þá er gjaldeyrisforði stærri en í mjög langan tíma í sögu þjóðarinnar og fjármagnshöft draga úr sveiflum í fjármagnsflæði. Seðlabankinn mun fylgjast náið með þróun alþjóðlegra og innlendra fjármálamarkaða næstu daga og endurmeta stöðuna eftir því sem ástæða kann að verða til.
Minnisblað Seðlabankans til stjórnvalda má nálgast hér:
Minnisblað Seðlabanka Íslands um efnahagsleg áhrif þjóðaratkvæðagreiðslu um aðild Breta að ESB