Fjármálainnviði má kalla „pípulagnir“ eða „vegakerfi“ markaðanna. Alþjóðagreiðslubankinn (BIS) og Alþjóðlega verðbréfanefndin (IOSCO) hafa lýst hugtakinu þannig: 

„Með fjármálainnviðum er átt við marghliða kerfi sem skilgreindir aðilar eru þátttakendur í og notuð eru til greiðslujöfnunar, uppgjörs eða skráningar greiðslna, verðbréfa-, afleiðu- og/eða annarra fjármálaviðskipta. Settar eru reglur og staðlað verklag sem gildir um alla þátttakendur í hlutaðeigandi innviðum, sameiginlegu tækniumhverfi og viðeigandi sérhæfðri áhættustýringu komið á fót. Fjármálainnviðir veita þátttakendum miðlæga greiðslujöfnunar-, uppgjörs- og skráningarþjónustu (…) sem gerir aukna skilvirkni mögulega og dregur úr kostnaði og áhættu. (…) Fjármálainnviðir geta stuðlað að auknu gagnsæi á ákveðnum mörkuðum. Sumir fjármálainnviðir eru mikilvægir til stuðnings framkvæmdar seðlabanka á peningastefnu og því hlutverki þeirra að stuðla að fjármálastöðugleika."

Kerfislega mikilvægir fjármálainnviðir á hverjum tíma eru einkum greiðslukerfi sem geta hrundið af stað kerfislegri röskun eða breitt hana út.

Fjármálainnviðir geta hvort heldur verið í eigu einkaaðila eða opinberra aðila. Að einhverju marki kunna ólík viðmið að eiga við um mismunandi tegundir fjármálainnviða. Verðbréfamiðstöðvar, sem eiga og reka verðbréfauppgjörs- og verðbréfaskráningarkerfi eru eftirlitsskyldir aðilar. 

Ófullnægjandi öryggi og skilvirkni í rekstri kerfislega mikilvægra fjármálainnviða getur valdið keðjuverkan milli þátttakenda og markaða. Virk og traust áhættustýring slíkra fjármálainnviða er afar mikilvæg enda geta áföll sem verða í eða tengjast rekstri þeirra haft veruleg neikvæð samfélagsleg áhrif. Í nútíma hagkerfum og fjármálamörkuðum þykir því viðeigandi að gera ríkar kröfur til kerfislega mikilvægra fjármálainnviða um fagleg vinnubrögð og rekstrarfyrirkomulag, svo og að fela yfirvöldum að veita slíkum rekstri virkt aðhald með það einkum að markmiði að lágmarka mögulega kerfisáhættu.

Samkvæmt PFMI-kjarnareglunum eiga millibanka- og verðbréfauppgjörskerfi að falla í flokk kerfislega mikilvægra fjármálainnviða. Kerfin uppfylla almenn skilyrði um kerfislegt mikilvægi og er þá vísað til íslenskra laga, veltu, færslufjölda, staðgengimöguleika o.fl. 

Millibankakerfið er stærsta og mikilvægasta greiðslukerfið á Íslandi. Öll fjármálafyrirtæki þurfa að eiga aðild að millibankakerfinu, hvort heldur beint eða óbeint, til að vera starfhæf á íslenskum fjármálamarkaði. Þá á endanlegt uppgjör verðbréfaviðskipta (þ.e. fjárhagsfærslur verðbréfauppgjörskerfa) sér stað í millibankakerfinu. Seðlabankinn nýtir sér millibankakerfið við framkvæmd peningastefnu. Það er farvegur fyrir vaxtaákvarðanir og þrautavaralán ef til kemur. 

Fjármálastöðugleikanefnd hefur staðfest millibankakerfi Seðlabankans (MBK) ásamt verðbréfauppgjörskerfi Nasdaq CSD SE sem kerfislega mikilvæga fjármálainnviði. 

Kerfislega mikilvægir fjármálainnviðir njóta almennt viðurkenningar og eru tilkynntir sem slíkir til Eftirlitsstofnunar EFTA (ESA) í samræmi við ákvæði laga nr. 90/1999, um öryggi fyrirmæla í greiðslukerfum og verðbréfauppgjörskerfum. Á vefsíðu framkvæmdastjórnar ESB er að finna lista yfir alla innviði á Evrópska efnahagssvæðinu sem njóta viðurkenningar samkvæmt tilskipun Evrópuþingsins og Ráðsins (the Settlement Finality Directive 98/26/EC), sem innleidd er hér á landi með lögum nr. 90/1999.

PFMI-kjarnareglurnar

Vegna netöryggis hafa PFMI-kjarnareglurnar verið útfærðar í sérstökum leiðbeiningum um eflingu viðnámsþróttar fjármálainnviða gegn netárásum.

Markmiðið er að kerfislega mikilvæg greiðslu- og uppgjörskerfi standist bæði alþjóðlegar og innlendar kröfur. Þær helstu eru kjarnareglur BIS/IOSCO fyrir kerfislega mikilvæg greiðslukerfi, lög og tilskipanir Evrópusambandsins á sviði greiðslumiðlunar og verðbréfauppgjörs, auk íslenskra laga og reglna. Umrædd kerfi skulu vera gagnsæ, skilvirk og örugg og skal uppbygging kerfanna taka mið af því að þeim er ætlað að stuðla að fjármálastöðugleika. Í samræmi við erlendar fyrirmyndir hefur Seðlabanki Íslands mikilvægu hlutverki að gegna við að stuðla að þessu: 

• Mótun stefnu varðandi þróun kerfanna (e. policy-making role) 
• Setningu reglna fyrir kerfin (e. regulatory role) 
• Stuðning við markaðslausnir og frumkvæði á þessu sviði (e. catalyst role) 
• Rekstur stórgreiðslukerfisins sem og uppgjör í jöfnunarkerfinu og verðbréfauppgjörskerfinu (e. operational role) 
• Eftirlit með kerfunum í samræmi við alþjóðlega staðla (e. oversight role)

Viðmið kjarnareglna BIS/IOSCO um kerfislega mikilvæga fjármálainnviði (e. Principles for Financial Market Infrastructures, PFMI) skulu lögð til grundvallar starfsemi Seðlabankans bæði við yfirsýn og í rekstri á kerfislega mikilvægum íslenskum fjármálainnviðum. 

Á grundvelli sjálfsmats kerfisstjórnar metur deild yfirsýnar fjármálainnviða á sviði fjármálastöðugleika Seðlabankans hlítni millibankakerfanna við sérhverja hinna 24 PFMI-kjarnareglna með vísan til eftirtaldra matsflokka: 

• Uppfyllt að öllu leyti (e. observed)
• Uppfyllt að meginhluta (e. broadly observed)
• Uppfyllt að hluta (e. partly observed)
• Ekki uppfyllt (e. not observed)
• Á ekki við (e. not applicable)