Ákvarðanir um beitingu stjórntækja Seðlabanka Íslands varðandi fjármálastöðugleika, eru teknar af fjármálastöðugleikanefnd. Ákvarðanir fjármálastöðugleikanefndar skulu grund­vallast á lögum og byggjast á vönduðu mati á ástandi og horfum í fjármálakerfinu. Vegna starfa nefndarinnar skal Seðlabankinn hafa samvinnu við önnur stjórnvöld, þar á meðal ráðuneyti sem fer með málefni fjármálastöðugleika. Í fjármálastöðugleikanefnd sitja Ásgeir Jónsson, Tómas Brynjólfsson, Björk Sigurgísladóttir, Rannveig Sigurðardóttir, Axel Hall, Bryndís Ásbjarnardóttir og Guðmundur Kristján Tómasson. Ráðuneytisstjóri, eða tilnefndur embættismaður ráðuneytis sem fer með málefni fjármálastöðugleika, skal eiga sæti á fundum nefndarinnar með málfrelsi og tillögurétt en án atkvæðisréttar. Nánar um nefndina hér: Fjármálastöðugleikanefnd Seðlabanka Íslands

Kjósa skal bankaráð Seðlabanka Íslands að loknum kosningum til Alþingis. Bankaráð skipa sjö fulltrúar kjörnir hlutbundinni kosningu af Alþingi ásamt jafnmörgum til vara.

Umboð bankaráðs gildir þar til nýtt bankaráð hefur verið kjörið. Láti bankaráðsmaður af störfum tekur varamaður sæti hans þar til Alþingi hefur kosið nýjan aðalmann til loka kjörtímabils banka­ráðsins.

Bankaráð velur formann og varaformann úr eigin röðum.

Seðlabankastjóri situr fundi bankaráðs og hefur þar tillögurétt og tekur þátt í umræðum. Hann skal þó víkja af fundi ef bankaráð ákveður. Innri endurskoðandi hefur rétt til setu á fundum bankaráðs og skal hann upplýsa bankaráðið reglulega um störf sín.

Bankaráð hefur eftirlit með því að Seðlabanki Íslands starfi í samræmi við lög sem um starf­semina gilda. Eftirlit bankaráðs tekur þó ekki til málsmeðferðar eða ákvarðana í einstökum málum.

Að öðru leyti skal bankaráð sérstaklega sinna eftirtöldum verkefnum:

• Staðfesta tillögur seðlabankastjóra og varaseðlabankastjóra að skipulagi bankans.
• Ákveða laun og starfskjör fulltrúa í peningastefnunefnd, fjármálastöðugleika­nefnd og fjár­mála­eftirlitsnefnd.
• Staðfesta starfsreglur peningastefnunefndar, fjármálastöðugleikanefndar og fjármála­eftirlits­nefndar.
• Hafa umsjón með innri endurskoðun við bankann og ráða innri endurskoðanda.
• Staðfesta kjarasamninga við starfsmenn bankans, fjalla um reglur um lífeyrissjóð þeirra og staðfesta skipun fulltrúa í stjórn hans þegar svo ber undir.
• Staðfesta tillögu Seðlabankans til ráðherra um reglur um reikningsskil og ársreikning bank­ans.
• Staðfesta ársreikning bankans.
• Staðfesta ákvörðun bankans um eiginfjármarkmið og ákvörðun um ráðstöfun hagnaðar.
• Staðfesta áætlun um rekstrarkostnað bankans sem seðlabankastjóri leggur fram í upphafi hvers starfsárs.
• Hafa eftirlit með eignum og rekstri bankans og staðfesta ákvarðanir um fjárfestingar í hús­næði og annarri aðstöðu fyrir starfsemina sem teljast meiri háttar.
• Staðfesta gjaldskrá. 

Veita skal bankaráði þær upplýsingar um Seðlabanka Íslands og félög í eigu bankans sem nauð­syn­legar eru til að ráðið geti sinnt lögbundnu hlutverki sínu.

Seðlabankastjóri skal jafnan upp­lýsa bankaráð um helstu þætti í stefnu bankans og um reglur sem hann setur.

Á fundi Alþingis 24. mars 2022 fór fram kosning sjö manna og jafnmargra varamanna í bankaráð Seðlabanka Íslands.

Starfsreglur bankaráðs Seðlabanka Íslands

Aðalmenn: Arnar Bjarnason, Gylfi Magnússon, formaður, Sigríður Andersen, Þórunn Guðmundsdóttir, Kirstín Þ. Flygenring, Sigurjón Arnórsson, Þorsteinn Víglundsson

Varamenn: Aðalheiður Sigursveinsdóttir, Þórlindur Kjartansson, Kristín Thoroddsen, Hildur Traustadóttir, Vilhjálmur Þorsteinsson, Oddný Árnadóttir, Jarþrúður Ásmundsdóttir